ஆப்கானிஸ்தானுக்கு 30 இளைஞர்களை கடத்திய சம்பவத்துக்கு பாகிஸ்தானைச் சேர்ந்த தெஹ்ரிக்-இ-தலிபான் அமைப்பு பொறுப்பேற்றுள்ளது. இவர்கள் அனைவரும் ஆப்கனில் உள்ள குணார் மாகாணத்துக்கு கடத்தப்பட்டனர். இவர்களில் சில இளைஞர்கள் கடத்தல்காரர்களிடமிருந்து தப்பி பாகிஸ்தானுக்குத் திரும்பி விட்டனர். கடத்தப்பட்ட இளைஞர்களை எவ்விதம் பயன்படுத்துவது என்பது குறித்து தெஹ்ரிக்-இ-தலிபான் அமைப்பின் தலைமைக் குழு முடிவு செய்யும் என்று அமைப்பின் செய்தித் தொடர்பாளர் இஷனுல்லா இஷான் தெரிவித்தார்.

பாகிஸ்தானில் பயிற்சி பெற்ற லஷ்கர் இ தொய்பா பயங்கரவாதி ஜுபைர் அகமதை (24) அமெரிக்க புலனாய்வு அமைப்பு எஃப்பிஐ, வெள்ளிக்கிழமை கைது செய்தது. அமெரிக்காவில் இருந்தபடி லஷ்கர் பயங்கரவாதிகளுக்கு இவர் பல்வேறு வகைகளில் உதவியுள்ளார். லஷ்கர் இயக்கம் தொடர்பான பிரசார விடியோக்கள் உள்ளிட்டவை இவரிடம் இருந்து கைப்பற்றப்பட்டுள்ளன. இந்த விடியோக்களில் சிலவற்றை இவரே தயாரித்துள்ளார் என்று எஃப்பிஐ தெரிவித்துள்ளது. 2007-ம் ஆண்டு அகமது தனது குடும்பத்துடன் பாகிஸ்தானில் இருந்து அமெரிக்காவுக்கு இடம் பெயர்ந்துள்ளார். அமெரிக்க குடியுரிமையையும் பெற்றுள்ளார். இவர் மீது சந்தேகம் ஏற்பட்டதை அடுத்து 2009-ம் ஆண்டு முதல் அமெரிக்க புலனாய்வு அமைப்பு கண்காணித்து வந்துள்ளது

நாடு கடந்த திபெத்தியர்களின் பிரதமராக லோப்சாங் சங்கே திங்கள்கிழமை பதவியேற்றுக்கொண்டார். இமாசலப் பிரதேசத்திலுள்ள தர்மசாலாவில் நடைபெற்ற நிகழ்ச்சியில் லோப்சாங்குக்கு தலைமை நீதிபதி கவாங் பெல்க்யால் பதவிப்பிரமாணம் செய்து வைத்தார். நிகழ்ச்சிக்கு திபெத் மதத் தலைவர் தலாய் லாமா தலைமை வகித்தார். இந்த நிகழ்ச்சியில் 5 ஆயிரத்துக்கும் மேற்பட்ட திபெத்தியர்கள் கலந்துகொண்டனர். திபெத், இந்தியாவில் இவர்கள் வசித்து வருகின்றனர். நிகழ்ச்சியில் தலாய் லாமா பேசியதாவது: நாடு கடந்த திபெத்தியர்களின் பிரதமராக லோப்சாங் சங்கே இப்போது பதவியேற்றுக் கொண்டிருக்கிறார். இந்த பதவியேற்பு நிகழ்ச்சியில் திரளாக கலந்துகொண்ட அனைத்து திபெத்தியர்களுக்கும் எனது மனமார்ந்த நன்றி. ஜனநாயக முறையில் நாடு கடந்த திபெத்தியர்களின் பிரதமர் தேர்வு செய்யப்பட்டிருக்கிறார்.